BAGUIO CITY – Nakasaganan ti transport sektor iti Baguio-Benguet a mangserbisyo iti publiko nangruna ta mangrugin ti klase dagiti estudyante inton lunes, Agosto 22.
Iti interview ti Bombo Radyo Baguio, kinuna ni Wilson Bumay-et Jr., Federation President ti Jeepney Association iti Baguio-Benguet, umdas ti bilang dagiti parapubliko a lugan nga agbiyahe iti nagduduma a ruta.
Inaklonna met nga adda dagiti pasahero nga agparparikut iti pagluganan ken adda pay dagiti ruta a makapaspasar iti attidog a pila.
Nupay kasta, inlawlawag ni Bumay-et a saan a gaputa daytoy iti kinakurang dagiti agbibiyahe a jeep nu di ket gapu iti trapiko ken kaadayo ti pagbiyahean dagitoy.
Iti baet daytoy, impanamnama ti opisyal nga ikagumaan dagiti jeepney drivers nga aguray iti agingga alas dies ti rabii depende iti dismissal dagiti empleyado ken estudyante a pasahero dagitoy.
Kabayatanna, iyap-apela ni Bumay-et ti panag-disinfect ken panagrepair dagiti drivers ken operators tapno natalged ti biahe dagitoy.
