BAGUIO CITY – Agtaltalinaed nga umdas ti suplay dagiti over the counter (OTC) drugs partikular ti paracetamol ditoy siudad ti Baguio.
Impasigurado daytoy ni Dr. Donabelle Tubera-Panes, Epidemiologist ti City Health Services Office (CHSO) kasaruno ti panagwaras ti damag iti hoarding ken panic-buying sadiay National Capital Region gapu iti agkurkurang a suplay ti paracetamol.
Sigun kenkuana, awan ti panagkurang ti paracetamol ken dadduma pay nga agas ti flu-like symptoms ditoy siudad gaputa saan pay a ngimmato ti demand wenno pagkasapulan iti daytoy.
Kinunana nga awan ti attidog a pila iti opisina ti CHSO ken kadagiti drug stores ditoy siudad tapno agdawat ken gumatang iti nasao nga agas.
Impettengna nga ado ti agar-aramid ti agas iti pagilian isut gapuna nga awan ti nasken a pagdanagan ti publiko seknan iti suplay dagitoy.
Gapu iti daytoy, iyap-apela ni Dr. Panes ti saan a panang-hoard wenno panangilemmeng ti publiko iti suplay ken panic-buying wenno panaglako uray saan met unay a kasapulan. (-Bombo Brigitte Marcasi)
