Impasigurado ni Department of Labor and Employment-Cordillera Assistant Regional Director Emerito Narag a maipaayan iti umno a pannusa dagiti kumpanya ken establishmento nga aglabsing iti General Labor Standard.
Sigun kenkuana, agtultuloy ti monitoringda iti rehiyon nu sadino iti 396 nga establishmento a sinukimatda idi napalabas a tawen, 86 kadagitoy ti nasarakanda a naglabsing iti General Labor Standard
Mainaig iti daytoy, dagiti panaglabsing dagiti employers ket pakairamanan ti saan a panag-remit ti Social Security System wenno SSS, PagIBIG, ken ti saan a pannakaipaay ti overtime pay, 13th month pay, usto a basic pay, service incentive leave, night shift deferential, holiday pay, ken rest day.
Impasiguradona met a nakorektar dagitoy nga aramid dagiti establishimento.
Inyunay-unay ni Narag a kasapulan a maipaay kadagiti mangmangged ti umno a work benefits ken wages-da gapu ta pinagrigatanda dagitoy.
Innayunna pay a nayunan ti Department of Labor and Employment ti panangisuro ken panangpalagip kadagiti establishmento iti responsibilidadda para kadagiti mangmangged kadakuada.
