Impannakkel ni Atty. John Paul Martin, Election Officer ti Commission on Election-Baguio a nagbalin a naannayas ken napintas ti umuna nga aldaw iti panangipila iti certificate of candidacy dagiti agkandidato nga agngayangay iti 2025 Midterm Elections.
Iti pannakiuman ti Bombo Radyo Kenkuana, kinunana nga adda ti uppat a nangipila iti kandidaturana no sadino dua a kina-kongresista ken dua met iti kina-konsehal.
Kaunaan ni Atty. Nicasio Aliping a nangipila iti kandidaturana para iti kina-kongresista.
Ni Atty. Aliping ket sigud a kongresista ken konsehal ti siudad.
Simmaruno ni Owen Jacques Demoni a nangipila iti kandidaturana para metlaeng iti kina-kongresista.
Nangipila met da incumbent Councilor Peter Cariño Fianza ken newcomer a ni Norma Ferrer Benuyo iti kandidaturada para iti kina-konsehal.
Sigun kenkuana, adda metten dagiti nakaschedule a grupo a mangipila iti kandidaturana no sadino dadduma kadakuada ket inton Oktubre tres, Oktubre a syete ken iti maudi nga aldaw ti filling of Certificate of Candidacy inton Oktubre otso.
Kabayatanna, inyuna-unay ni Atty. Martin kadagiti kandidato a saan a mabalin nga agturong dagitoy kadagiti filing venues nga ima-ima gapu ta masapol nga awitdan dagiti kaskenan a dokumento tapno saan a maitantan partikular iti maudi nga aldaw.
Namnamaenna met a maakomarda amin dagiti mangipila iti kandidaturana agingga nga agleppas ti nasao nga aktibidad.
