BAGUIO CITY – Natalgeden ti kasasaad dagiti 12 kadagiti 14 nga indibidual a nadangran iti panaka-aksidente ti maysa a dump truck sadiay Tabuk City, Kalinga idi April 20, Sabado.
Sigun iti Kalinga Police Provincial Office, minor injuries laeng ti sinagrap dagiti 12 kadagiti biktima bayat a nakaro ti dunor dagiti dua pay a biktima nga agtaltalinaed iti pagagasan.
Maipalagip a walo nga indibidual ti pimmusay iti nasao nga aksidente a pakairamanan ti dua a menor-de-edad.
Sigun iti pulisya, pagpampanunutan pay dagiti kabagian dagiti biktima no mangipilada iti kaso kontra iti driver a ni Mark John Lazaro, 20-anyos, residente ti Mosimos, Dupag, Tabuk City.
Maibasar iti salaysay ti driver, paturong kuma dagitoy sadiay Barangay Balawag tapnu makipaset iti tradisyonal a ‘posipos’ ngem idi makadtengda iti pasang-at a paset ti kalsada ket napaay daytoy a nag-shift iti lower gear.
Nagresulta daytoy iti panag-atras ti lugan agingga a natnag iti rangkis nga addaan kauneg a lima a metro.
