BAGUIO CITY – Maladingitan ni Baguio City Police Office City Director PCol. Allen Rae Co iti maatap a panakibiang ti maysa a judge iti kaso ti taxi driver a nangdarundun iti maysa a pulis a traffic enforcer sadiay Abanao Street, Baguio City.
Sigun kenkuana, dakkel ti panangraemda iti nasao a judge isut gapuna a nasken a saan kuma daytoy a nakibiang iti nasao a kaso ti taxi driver ken binaybay-an daytoy a ti linteg ti masurot.
Kinunana nga ar-aramiden laeng ni Patrolman Julius Walang ti trabaho daytoy ken naisebba ti biag ni Walang idi napasamak ti panagdarundun.
Innayon ni Col. Co a nasair ti rikna dagiti pulis idi nagturong ti maseknan a judge iti Station 7 ti BCPO nangruna ta saanna nga innala ti benneg ni Walang iti pudpudno a napasamak.
Dinakamat pay ti direktor a no biddut man ti panangkemmeg dagiti pulis kenni Jone Buclay a driver ti “J Mabalot Taxi” ket rumbeng a makwestionaran daytoy iti umno a venue wenno forum.
Sigun kenkuana, nasken koma a maawatan ti judge ti sitwasyon gaputa eksperto daytoy iti linteg.
Isagsagana metten ti pulisya ti kaskenan a kaso kontra iti taxi driver.
Kabayatanna, kiniddaw ni DILG Secretary Eduardo Año ti panakiballaet ti Korte Suprema iti maatap a panakibiang ti maseknan a judge iti nasao a kaso ti taxi driver.
Dinayawna met ni Patrolman Walang partikular ti kinatured nga impakita daytoy tapno maaramidna ti mandatona kas panakabagi ti linteg.
Kinunana a kas kenni Walang ti klase ti pulis a masapul ti pagilian gaputa nakasagana daytoy a mangibuis iti biagna para iti trabahona.
Kinunana nga agserserbi ni Walang kas inspirasyon iti PNP ken ti dadduma pay a law enforcers.
Immunan a pinaglibakan ti maseknan a judge ti alegasyon kenkuana.
