BAGUIO CITY – Saan a kunsintiren ti Baguio City Police Office (BCPO) ti aniaman nga iligal nga aramid dagiti personnel daytoy nangruna no mapaneknekan a guilty.
Nailanad daytoy iti waragawag ni PCol. Allen Rae Co, Acting City Director ti BCPO kasaruno ti panangkemmeg ti Counter Intelligence Task Force (CITF) ken PNP-Intel Group kenni Police Lt. Col. Allan Docyogen, chief ti city intelligence Unit ti BCPO iti maysa nga entrapment operation idi kalman gapu iti maatap a panagkikil daytoy iti maysa a kriminal.
Sigun kenni Co, asinoman a pulis a mapaneknekan a guilty iti panagaramid ti kapada nga iligal nga aramid ket dagus a maimbestigaran, makasuan ti administratibo ken kriminal ken madusa.
Kinunana a supsuportaranda dagiti aksion ken efforts ti CITF iti panagdalus iti organisasyon ti pulisya manipud kadagiti scalawags ken ituloyda ti nainget pay nga internal cleansing campaign ti pulisya.
Ipaspasigurado ni Co iti publiko nga agtultuloy ti panagserbi dagiti pulis ti Baguio nga addaan ti dignidad, gaget, kinapatas ken integridad tapnu mapagtalinaed ti kilatalged ditoy City of Pines.
Impettengna pay a saanda nga ipalubos a dagiti aksion ken biddut dagiti sumagmamano laeng a pulis-Baguio ti mangdadael iti imahe ti entero a BCPO.
Agtultuloy metlaeng ti kampanyada tapnu mapasayaat pay ti bukodda a bagi ken ti panagserbida iti publiko tapnu dagitoy ket pudpudno ken maiparbeng a maawagan kas Baguio’s Finest. (-statement ti BCPO)
