BAGUIO CITY – Kidkiddawen ni Atty. Ana Marie Rafael-Banaag, Assistant Secretary for Legal Affairs ti Presidential Communications Operations Office ti panangrespeto dagiti member-consumers ti Benguet Electric Cooperative (BENECO) iti proseso iti panakapili ti sumaruno a general manager ti kooperatiba.
Iti eksklusibo ng interview ti Bombo Radyo Baguio, kinunana a saanna nga ipilit a kayaten daytoy dagiti member-consumers ken ti napateg ket saanda a dadaelen ken insultuen daytoy gapu iti panakakwalipikarna iti nasao a posisyon.
Impettengna a nagnada kenni Engr. Melchor Licoben, ti agdama nga officer-in-charge ti kooperatiba iti umno a proseso idi pay October 2020 kas iti nagduduma nga eksaminasyon, background investigation ken interviews.
Kinunana nga awan ti aniaman a pakainaiganna iti nagbalin a proseso gaputa kas maysa nga aplikante ket nagtulnog laeng dagitoy kadagiti naibaga nga aramidenda.
Dinakamat ni Atty. Banaag a mabalin met latta a kwestionaran dagiti member-consumers ti BENECO ti National Electrification Administration (NEA) seknan iti nagbalin a proseso iti panakakwalipikarna iti kina-general manager ti kooperatiba.
Kinunana nga adda pay iti Board of Directors ti kooperatiba no kumpirmarenda daytoy tapnu madutukan kas general manager wenno saan ket ibasurada ti endorsement ti Board of Administrators ti NEA.
Nupay kasta, inlawlawagna a nasken a balido ti rason no apay a maibasura ti endorsement kenkuana gaputa no saan a balido ket mabalin a mismo a ti Board of Administrators ti NEA ti mangdutok kenkuana kas general manager ti BENECO.
Impetteng pay ni Atty. Banaag nga awan ti pakainaigan ni Presidente Rodrigo Duterte iti panangiyendorso ti Board of Administrators ti National Electrification Administration (NEA) kenkuana kas sumaruno a general manager ti BENECO.
Kinunana a ti panakaiyendorsona kas sumaruno a general manager ti BENECO ket saan a na-shortcut wenno na-railroad tapnu ti pagayatanna, wenno saan ket ti pagayatan ni Pres. Duterte wenno ni Senator Go ti matungpal.
Kagiddan iti daytoy, inkarina nga aramidenna ti amin tapnu agbalin a transparent ken salwadanna ti kwarta ti BENECO a kwarta metlaeng dagiti member-consumers ti kooperatiba.
Innayonna a tutukanna ti panagpataud ti kuryente nangruna ta nabaknang unay ti Benguet kadagiti natural resources para iti nasao a banag.
Dinakamatna pay a dandani malpas ti kontrata ti BENECO ken ti coal-fired power plant sadiay Sual, Pangasinan a paggatgatangan ti kooperatiba iti kadakkelan a suplay ti kuryente para iti Baguio ken Benguet isut gapuna a napimpintas a maadal ti panaka-aramat dagiti natural resources ti Benguet para iti panakapataud ti suplay ti kuryente.
