Makaaw-awat iti pammabalaw ken nagduduma a reaksyon ti impeksa ni US President Donald Trump kabayatan ti inaugural speechna a dua laeng a gender ti mabigbig sadiay Estados Unidos, ti babai ken lalaki.
Iti panakiuman ti Bombo Radyo kenni Jun Delfrado Villanueva, Bombo International News Correspondent sadiay Estados Unidos, kinunana nga ado a transgender ti nangiyebkas iti saanda a panag-anamong iti kinuna ni US President Trump kasta met a nalawag a panagatake daytoy kadakuada.
Kiddaw met dagiti transgender ti nasayaat a panakabigbig dagitoy iti trabaho ken iti aglawlawda tapno matratoda kas kadagiti normal a babbai ken lallaki.
Sigun kenni Villanueva, ti tarigagay laeng dagiti transgender wenno dagiti karaman iti LGBTIQA+ ket ti natalinaay a panagbiag.
