BAGUIO CITY – Dakkel ti bimmabaan ti bilang dagiti sangaili a nagturong iti Biking Area ti Burnham Park ditoy siudad ti Baguio ita a Valentines Day.
Iti pannakiuman ti Bombo Radyo News Team iti maysa nga agpapaabang ti bisikleta a ni Lino Akilit, kinunana nga adayo ti deperensia ti kasasaad ita no idilig kadagiti napalpalabas.
Dinakamatna a dakkel ti epektona kadakuada a negosiante ti pannakaiyakar ti petsa dagiti aktibidad ti Panagbenga 2020.
Inlawlawagna a nagresulta daytoy iti panagbaba ti bilang dagiti turista nga agturturong ditoy siudad.
Kinuna ni Akilit a kadagiti napalabas ket adu a dagus dagiti agbisikleta uray agsapa pay laeng ngem ita ket manmano laeng dagiti agturturong iti biking area.
Sigun pay kenkuana, saanda met a mabalin nga ibaba ti abang iti bisikleta gapu ta mailabsing daytoy iti polisia.
Mangnamnama laengen ni Akilit ken dagiti padana a negosiante nga umadu dagiti apan agbisikleta sadiay Burnham Park ita a malem kalpasan ti klase dagiti estudiante ken ti trabaho dagiti mangmangged.
