Impakaamo ti Philippine National Police (PNP) nga inikkatdan ti “police security” para kadagiti VIP wenno napapataeg nga indibidual kas maitunos iti baro a polisiya.
Sigun kenni PNP chief Police General Rommel Francisco Marbil, nagbaliw ti polisiya kasaruno ti panagtugawna kas dadaulo iti nasao nga ahensia.
Nakalanad iti polisiya a saan a rumbeng a maipaayan iti VIP protection ti siasinnoman gaputa saanda a trabaho daytoy nu diket mangipaay ti seguridad kadagiti indibidual a makapaspasar iti pangta ti panagbiag.
Karaman kadagiti nadakamat ti nasao nga opisial a saan a kasapulan a maipaayan iti “special treatment” ket dagiti nababaknang a tattao a mangpanpanunot a puntiria dagitoy dagiti dadduma a tattao.
Kasaruno ti napasaranna itay kallabes a panangipaay ti seguridad ti maysa a Chinese paturong iti hotel a nagdagusanna.
Aklonenna a saan a naragsakan daytoy gaputa nagserbi ti maysa a kameng ti pulisya kas taga-awit ti bag daytoy.
Malaksid kadagiti makapaspasar iti pangta ti panagbiag, karaman pay kadagiti mabalin a maipaayan ti “police security” ket dagiti nangangato nga opisial, sigun paylaeng kenni Marbil.
