Saanen a mangnamnama ni Vice President Sara Duterte a maipaay ti hustisya iti ama daytoy a ni sigud a president Rodrigo Duterte iti sangsangwenna ita a kaso a crime against humanity.
Sigun iti bise presidente, saanna a makitkita a maaddaan iti umno a proseso ti kaso ti ama daytoy iti benneg iti gobyerno iti Pilipinas gapu iti inladawanna nga extraordinary rendition nga inaramid iti agdama nga administrasyon.
Kagiddan dayta, idawdawat ni VP Sara a saanen a mapasamak ti kapada a sitwasyon kadagiti daduma pay a Pilipino.
Mainaig iti dayta, maangay met ti panagdengngeg iti Senado seknan iti proseso iti panakaarestar ni FPRRD a sigun kenni VP Sara ket posible a pakaaramidan dagiti pagalagadan ken panakabukel dagiti paglintegan tapno maliklikan ti panakapasamak ti kapada a sitwasyon.
