BAGUIO CITY – Tinubngar ti Department of Health (DOH) – Cordillera ti inwaragawag ni Mayor Benjamin Magalong a posible a ngumato ti kaso ti COVID-19 iti siudad ti Baguio kadagiti sumarsaruno a lawas gapu iti pangta ti Delta variant.
Impetteng ni DOH-Cordillera Assistant Regional Director Dr. Amelita Pangilinan a nalidem a mapasamak daytoy gaputa awan paylaeng ti nailista wenno nakauneg a Delta variant ditoy siudad kas maibasar iti nainget a panagwanawanda ken kadagiti specimens nga atapenda a COVID-19 Delta variant nga insumitirda iti Philippine Genome Center.
Kinunana a patta-patta laeng ni Mayor Magalong ti waragawag daytoy gaputa adda paylaeng ti Baguio iti moderate risk ken 9.82% ti average attack rate a mailislista iti innaldaw.
Nupay kasta, inaklonna nga adda ti posibilidad a mapasamak ti pattapatta ti mayor no saan a masurot ti 4-door strategy ti DOH a pakairamanan ti nainget a border checkpoint, panakasurot ti minimum health standards ken dadduma pay.
Innayon pay ni Dr. Pangilinan nga iti kanito a mapasamak ti pattapatta ni Mayor Magalong ket nakasagana met dagitoy nga agresponde.
Immuna iti daytoy, amken ni Baguio City Mayor Benjamin Magalong a rinibribon ti kaso ti B.1.1.7 wenno UK variant ken B.1.351 wenno South African variant ti COVID-19 iti siudad ti Baguio.
Sigun kenkuana, saanen a ti original variant ti COVID-19 ti kadawyan a kaso ti nasao a sakit iti lokalidad no di ket ti Alpha ken Beta variants kas maibasar iti datos manipud iti Philippine Genome Center (PGC).
Kinunana a 136 ti kaso ita ti UK variant ken South African variant, no sadino, 70% ti Alpha variant ken 30% ti Beta variant.
Innayonna a daytoy ti rason no apay a ngimmato ti kaso ti COVID-19 variants iti siudad idi napalabas a bulan ti Abril.
Nupay kasta, dinakamatna nga inaklon a mismo ti PGC a saanda a kabaelan a mangduktal a dagus iti variants dagiti naisumitir nga specimens sadiay.
Kabayatanna, imbinglayna manen a posible a ngumato ti kaso ti COVID-19 ditoy siudad inton sumaruno a lawas gapu iti pangta ti Delta variant.
Impettengna a saan a malapdan ti isasangbay ti Delta variant iti siudad ngem maprebentaran daytoy babaen iti panangipatungpal kadagiti nainget a pagalagadan.
