BAGUIO CITY – Nailista ti kaunaan a kaso ti ipupusay gapu iti leptospirosis ditoy siudad ti Baguio ita a 2019.
Iti panakiyuman ti Bombo Radyo kenni Dr. Donnabel Tubera, dadaulo ti Epidemiology and Surveillance Unit ti City Health Services Office, kinunana a ti biktima ket 24-anyos a babai a taga-Magsaysay ditoy siudad.
Kinunana a saanda pay a nakasarita ti pamilya ti biktima gaputa agladladingit paylaeng dagitoy ngem kas maibasar iti rekord ti opistal a nagpatamingan ti biktima ket naka-tsinelas daytoy idi nagna iti danum a naurnong manipud iti panagtudona idi maikatlo a lawas ti Hunyo.
Innayonna a kitkitaenda ti posibilidad nga adda ti open wound ti biktima a simrekan ti bakteria a nangitunda iti sakit a leptospirosis.
Kabayatanna, dinakamatna a ti dua pay a kaudian a biktima ket agpada a naka-confine ita ken maipaspasidongda iti kidney dialysis iti Baguio General Hospital and Medical Center kalpasan a naimpeksion met ti kidney dagitoy gapu iti leptospirosis.
Sigun kenni Dr. Tubera, posible a naala dagiti dua ti impeksion ti leptospirosis kabayatan ti panagdalusda iti establishimiento a pagtatrabahuanda ditoy sentro ti siudad.
Impeksana pay ti panaka-alarmada gaputa daytoy ti kaunaan a gundaway nga adda ti natay ken naimpeksion iti leptospirosis ditoy sentro ti Baguio nangruna ta kadawyan a kaso ti nasao a sakit a mailislistada ket dagiti mannalon ti agbalbalin a biktima.
