BAGUIO CITY – Naispal ti 10 a babbai manipud iti maysa a balay paginuman nga agserserbi a prostitution den sadiay Marcos Highway ditoy siudad ti Baguio idi rabii.
Naisayangkat ti rescue operation kalpasan a nagpositibo ti surveillance nga insayangkat dagiti otoridad kalpasan a nakaawat dagiti personnel ti Regional Special Operations Group ti Cordillera Police iti impormasyon mainaig iti prostitusyon a maipatpatungpal iti nasao a balay paginuman.
Nagresulta ti operasyon iti panakatiliw da Roldan De La Cruz Mangila, 38-anyos, tubo ti Caloocan City, residente ti Baguio City ken Louie Macatuno Jamora, 33-anyos, manager ti nasao a bar, tubo ti Las Piñas City, residente ti Baguio City.
Naispal met iti operasyon ti 10 a babbai nga agtawen ti 26-40 ken agserserbida kas waitress, entertainer, dancer ken cook a bin-ig a residente ti Baguio City ngem tubo dagitoy iti nagduduma a lugar, partikular iti Bicol, Caloocan City, Cavite, Rizal, Manila, Sorsogon, Lanao Del Norte ken Quezon City.
Naiturong iti istasyon ti pulisya dagiti babbai ken dagiti dua a natiliw nga indibidual ken sadiay a naipasidong dagiti babbai iti counselling babaen iti social workers ti DSWD.
Sumangsango metten dagiti dua a natiliw iti kaso a human trafficking, partikular ti panaglabsing iti Republic Act 9208 wenno ti Anti-Trafficking in Persons Act of 2012.
