BAGUIO CITY – Indeklara dagiti amin a 10 a munisipyo ti Mountain Province kas ‘persona non grata’ ti Communist Party of the Philippines – New People’s Army – National Democratic Front (CPP-NPA-NDF) kalpasan dagiti kaudian a serye ti engkwentro iti nagbaetan ti tropa ti gobyerno ken dagiti NPA.
Nagsasaruno nga impasa dagiti lokal a gobyerno dagiti munisipyo ti Montañosa ti resolusyon a mangidekdeklara iti komunista a grupo kas ‘persona non grata’ iti lugarda.
Rinugian ti Bauko ti nasao nga addang kalpasan a napwersa a nagbakwit dagiti nasurok sangaribo a residente daytoy kalpasan a rimsua ti rinnupak sadiay Mt. Kapuwaw idi ngudo ti Marso ken umuna a lawas ti Abril.
Simmaruno a nagaramid iti kapada nga addang ti Sagada, Besao ken Sadanga nga addaan agtutubo idi late 80’s ken early 90’s a nagserbi kas units ti NPA a nangriribuk kadagiti probinsia ti Benguet, Ifugao ken Abra.
Pinatibker ken biniag met ti Tadian ti resolusyonda idi 2017 ken 2018 a mangipawpawil kadagiti NPA iti lugarda ken daytoy ket inaramid met ti Bontoc ken Natonin nga ili dagiti sumagmamano a notorious leaders ti NPA-NDF.
Impeksa met ti Barlig ken Sabangan ti panagdanagda iti epekto ti terorismo iti nakappia a panagdur-as dagiti barangay dagitoy.
Sigun iti maysa a sigud a mass base leader ti NPA-Cordillera People’s Democratic Front, nagbalinen nga irrelevant wenno awan serbi ti NPA iti panakaragpat ti kappia, hustisya ken panagdur-as iti komunidad kagiddan ti panang-awagna kadagiti komunista kas ‘ulbod’.
