BAGUIO CITY – Sumangsango iti kaso a panaglabsing iti RA 9165 wenno Comprehensive Dangerous Drugs Act of 2002 ti 14 a turista, pakairamanan ti maysa a menor de edad gapu iti panangibiaheda iti iligal a droga, partikular ti marijuana kalpasan a nakemmeg dagitoy sadiay Bontoc, Mountain Province idi kanikadua.
Sigun kadagiti otoridad, nakaawatda iti impormasyon seknan iti panangibiahe dagiti nasao nga indibidual babaen iti maysa a gray van nga addaan plaka nga NDA 9871 kadagiti mapapati a marijuana.
Dagus a naisayangkat ti checkpoint/interdiction operation iti Bontoc-Kalinga National Road partikular sadiay Caluttit, Bontoc, Mountain Province a nagresulta iti panangpasardeng dagiti operatiba iti nasao a van ken iti panakakumpiskar dagiti sumagmamano a marijuana.
Nabigbig dagiti nakemmeg a da John David Ibale Tapar, 31, driver ti van; Benjamin Ibale Tapar, 24, estudyante; John Paul Avana Calimlim, 24; David Kim Tacusalme Ocampo, 23, driver; Ralph Cabral Basilio, 24; Michael Buan Reyes, 26; Audie Ramos Galany, 49, negosyante; Princess Ibale Galany, 37, bank employee; Miguel Lorente Irieman, 24, sales agent; Julius Maynete Carbao, 22; Robert Bautista Sosa, 19, operator ti international wiring system; Clarisa Bautista, 23, online seller; Jomar Lee Sicat Maynete, 24; ken maysa a 17-anyos; bin-ig a residente dagitoy sadiay Tarlac City.
Nakumpiskar manipud iti van ti tallo a backpack ken ditoy a naala ti tallo a bricks ti dried marijuana leaves, dua a rolyo ti dried marijuana leaves, maysa a zip lock a naglaon ti dried marijuana leaves ken maysa a tupperware a naglaon ti dried marijuana leaves nga aggatad amin iti dumanon P365,000.
Naamuan iti kanayonan nga imbestigasyon a nagtaud dagitoy sadiay Buscalan, Tinglayan, Kalinga.
Nupay kasta, awan ti asinoman kadagiti nakemmeg ti nangaklon nga akinkukua kadagiti nasao a backpacks a naglaon kadagiti marijuana.
