Immapela ti National Bureau of Investigation (NBI) – Alaminos City, Pangasinan kadagiti biktima ti sekswal a panagabuso a saanda nga agbuteng nga agkamang kadagiti otoridad tapno matulongan dagitoy.
Kasaruno daytoy ti pannakatiliw ti dua nga indibidual idiay Bolinao, Pangasinan babaen iti bileg ti search warrant nga impaulog ti NBI Anti-Organized and Transnational Crimes Division gapu iti sekswal a panagabuso.
Iti interview ti Bombo Radyo Dagupan kenni Atty. Fabienne Matib, Agent-in-Charge ti nasao nga opisina, nirames ti step-father ti 15-anyos a balasang iti namin-ado a daras bayat a ti ina mismo ti biktima ket nagserbi pay kas look-out.
Sigun kenni Atty. Matib, nagpulong ti biktima iti ikitna (auntie) nga adda idiay Manila a dagus met a naireport iti opisina ti National Bureau of Investigation idiay Alaminos City.
Nangitunda daytoy iti pannakatiliw da Faustino, step-father ti biktima ken Annaliza, ina ti biktima.
Kinuna ni Atty. Matib a namin ado a daras a narames ti biktima nangruna nu agaw-awid daytoy manipud iti pagadalanda ken ti ina pay ti biktima ti agserserbi kas look-out bayat ti pannakapasamak ti krimen nu sadino kinunana pay iti anakna a surotenna latta ti kayat ti step-fatherna.
Iti agdama ket nakabalud dagiti suspek iti National Bureau of Investigation (NBI) Manila idiay Muntinlupa ken sumangsango dagitoy iti kaso nga Statutory rape nga awanan ti piyansa ken Acts of Lasciviousnes nga addaan ti piyansa a P200,000.
Impeksa ni Atty. Matib a manmanu ti kastoy a kaso iti masakupanda a lugar ngem agtultuloy latta ti panangpalagipda kadagiti biktima ti sexual abuse tapno dagus nga agkamang dagitoy kadagiti otoridad.
