Nawayawayaanen ti 19-anyos nga estudyante manipud Bakakeng Norte, Baguio City a suspek iti ipupusay ti 45-anyos a babae manipud Loakan Proper, Baguio City kalpasan a nagtulagan ti fiscal ken ti lawyer ti pamilya ti biktima a mai-regular filing daytoy.
Maipalagip a napasamak ti vehicular traffic accident a nakatayan ti babae sadiay Loakan Proper, Baguio City.
Iti panakiuman ti Bombo Radyo kenni PMaj. Marcy Grace Marron, panakangiwat ti Baguio City Police Office, kinunana a nagapu sadiay Kias ti lugan nga imanmaneho ti 19-anyos no sadino paturong daytoy sadiay Ongasan.
Nupay kasta, bayat ti panagdalyasat ti suspek iti Access Road ti Loakan Proper, Baguio City, inovertake-anna ti maysa a lugan no sadino daytoy ti nangitunda iti panakadungpar ti biktima.
Maibasar iti impormasyon a naawat ti opisyal naipurwak ti biktima iti agarup 65 meters manipud iti nakadungparanna.
Gapu iti dayta, nagsagrap ti biktima iti open skull fracture a nangitunda iti dagus nga ipupusayna.
Saan met a naan-ano ti suspek ken ti kakaduana iti uneg ti lugan.
Iti agdama, nakamassayag ti bangkay ti biktima iti Enesa-Comising Residence, sadiay Purok Arupong, Lasar Arae, Loakan Proper ngem panggep ti pamilyana nga iyawid ti bangkayna sadiay Colalo, Mankayan, Benguet.
Possible met a sumango ti suspek iti reckless imprudence resulting to homicide.
Kagiddan dayta, nagpalagip daytoy kadagiti motorista ken iti publiko nga agannad iti kanito a dumalyasat kadagiti kalsada.//Bombo Noveh Organo
