BAGUIO CITY – Dumanon iti P2.7 billion ti inaprubaran ti konseho a pundo ti Baguio City para iti tawen 2024.
Iti interview ti Bombo Radyo kenni Budget Officer Atty. Leticia Clemente, 14% laeng ti ngimmatoan ti pundo iti sumaruno a tawen nu idilig iti agdama a tawen.
Malaksid iti national share, maysa a pagtaudan ti pundo ti siyudad ket manipud kadagiti business taxes.
Imbinsa ni Atty. Clemente a P410 million ti nailatang a pundo para iti development fund nu sadino P120 million ti maaramat iti development ti Session Road.
Nasurok P449 million a pundo ti nailatang para iti General Sevices kas ti hauling ken disposal ti basura ken dadduma pay nga operating expenses.
Agarup P111 million a pundo iti City Environment and Parks Management Office (CEPMO) para iti pannakamintinar dagiti nagduduma a parke.
Adda ti 1% a discretionary fund para iti opisina ti mayor a maaramat para kadagiti pakaseknan dagiti sumarungkar iti nasao nga opisina.
Adda metlaeng ti nailatang a pundo iti Social Services, City Health Services, Engineering Services, Disaster Risk Reduction Management.//Bombo Rob Dominguez
