BAGUIO CITY – Malamlamayan ita dagiti bangkay ti dua nga agpagayam kalpasan a nakali dagitoy manipud iti pagtaengan a nagaburan iti napasamak a panagreggaay ti daga iti bantay sadiay Talop, Kinakin, Banaue, Ifugao idi parbangon kalman.
Nabigbig dagitoy a da Emiliano Lupais ken Ernesto Ceraos, agpada a residente iti nasao a lugar.
Iti interview ti Bombo Radyo, kinuna ni PMaj. Michael Dangilan, hepe ti Banaue Municipal Police Station a posible a nargaay ti daga kalpasan a limmukneng daytoy gapu iti napasaran sadiay a nagtultuloy a panagbayakabak ti napigsa a tudo.
Sigun kenkuana, naaramid iti light materials ti balay isut gapuna a nalaka a nadadael idi nagaburan iti daga a nagresulta tapnu magaburan met dagiti matmaturog a biktima.
Nagsaruno met a nakali dagiti nagresponde a pulis ken bombero dagiti bangkay ti dua iti insayangkatda a search and retrieval operation.
Maibasar iti impormasyon, tawen 1995 idi nargaay metlaeng ti nasao a bantay a nagresulta iti panakagabur ken ipupusay ti agarup nasurok 15 nga indibidual.
Kabayatanna, nailista metlaeng ti dakkel a pannagreggaay ti daga iti kapada a barangay a nagresulta iti panakadadael ti retaining wall nga asideg iti Kinakin Elementary School no sadino, nairaman iti daga ti lugan ti prinsipal ti Banaue National High School.
Intunda daytoy ti panagbayakabak ti napigsa a tudo iti napalabas a tallo nga aldaw sadiay Ifugao.
Naamuan pay kenni Major Dangilan nga adda metlaeng ti sumagmamano nga insidente ti panagreggaay ti daga sadiay Banaue, Ifugao ngem awan met ti naipadamag kadakuada a nadangran wenno pimmusay.
