BAGUIO CITY – Nakemmeg ti dua nga indibidual bayat a maan-anop ti maysa pay a kadwa dagitoy kalpasan a nakumpiskaranda ti iligal a droga kabayatan ti panakaiserbi ti warrant of arrest ti maysa kadagitoy sadiay Montibello Village, Bakakeng Norte, Baguio City idi kanikadua.
Maibasar iti blotter, iserbi kuma dagiti nagtipon a pwersa ti Baguio City Police Office ti warrant of arrest ni Abdhul Abdhulahi Fabregas a sumangsango iti kaso a panagrames ken panaglabsing iti RA 7610 wenno ti Special Protection of Children Against Abuse, Exploitation and Discrimination Act.
Nupay kasta, kabayatan ti operasyon ket nadanunan dagiti otoridad ti lugan ni Fabregas ken idi asitganda daytoy ket killaat a pimmanaw.
Kinamat daytoy dagiti otoridad agingga a nakamakamda sadiay Bakakeng Norte ngem sadiay a naduktalan a ti mangimanmaneho iti lugan ket saan a ni Fabregas ngem ketdi, nabigbig a ni Earl John Romero.
Sigun kenni Romero, imbaon laeng daytoy ni Fabregas a mangipan iti nasao a lugan sadiay New Lucban ngem nagsubli manen sadiay Montibello Village kalpasan a saan a nagpakita ni Fabregas ken imbilin manen daytoy ti panangiyawidna iti nasao a lugan iti ab-abanganda a transient house.
Impalukat dagiti otoridad dagiti dua a silid iti nasao a balay ket sadiay a naaktuwan ti maysa a pakete ti mapapati a shabu nga agdagsen ti agarup nasurok 3 grams ken maysa a container ti maatap a napagango a bulong ti marijuana nga agdagsen ti agarup nasurok 5 grams.
Nakumpiskar metlaeng manipud kenni Romero ti maysa a pakete ti shabu nga agdagsen ti agarup nasurok 3 grams.
Nagresulta daytoy iti panakakemmeg ni Romero ken ti maysa pay a kadwada iti nasao a balay bayat a maan-anop paylaeng ni Fabregas.
