BAGUIO CITY – Pimmusay ti dua a pulis kalpasan a pinalpaltogan dagitoy ti padada a pulis iti uneg ti barracks ti Regional Mobile Force Battalion 15 sadiay Brgy. Viewpoint, Banaue, Ifugao idi parbangon.
Nabigbig dagiti biktima a da Police Staff Sergeant Romualdo Ngina Jr, agtawen iti 32, naasawaan ken residente ti Otucan, Bauko, Mountain Province ken ni Patrolman Rey Wan-aten, agtawen iti 30 ken residente Kibungan, Benguet.
Nabigbig met ti suspek a ni Police Corporal Paul Cungihan Badangayon, agtawen iti 28, naasawaan ken residente ti O-ong, Hingyon ifugao.
Maibasar iti imbestigasion, agay-ay-ayam iti finger wrestling wenno torsi dagiti biktima ken suspek idi saan dagitoy a nagkikinnaawatan maipapan kadagiti polisia iti ay-ayam.
Nadangran ti ramay ti suspek a nangitunda tapno panawanna dagiti biktima ngem sakbay daytoy a pimmanaw ket nangisawang iti dakes a pannarita kontra kadagiti biktima.
Gapu iti daytoy ket sinurot ni Ngina ti suspek iti kuarto daytoy ken sadiay a kinomprontar ken dinanogna ti suspek.
Inasot met ti suspek ti issued short firearm wenno ti paltog daytoy ken pinalpaltoganna ni Ngina ken nairaman a napaltogan ni Wan-aten a nanggandat a manganawa iti dua.
Dagus a naitaray iti Bontoc General Hospital dagiti biktima ngem naideklara dagitoy dead on arrival gapu kadagiti tama ti bala ti paltog a sinagrap dagitoy.
Nakemmeg ti suspek ken maisagsaganan ti kaso a maipila kontra kenkuana.
