BAGUIO CITY – Natiliw ti tallo a drug personalities iti nagsisina a buy-bust operations nga insayangkat dagiti otoridad ditoy siyudad ti Baguio ken sadiay La Trinidad, Benguet itay laeng nabiit.
Nabigbig dagitoy a da P-Jay Jimenez, 34-anyos, taxi driver; Ericson Salonga, 21-anyos ken Christopher Rodriguez, 21-anyos, food delivery rider, no sadino, bin-ig a residente dagitoy ti Baguio City.
Natilliw ni Jimenez sadiay Santo Tomas Proper kalpasan a nangilako ti 0.5 gram ti maatap a shabu iti nakatransaksionna nga operatiba ken nakumpiskar pay kenkuana ti kanayunan a 0.5 gram ti maatap a shabu, pouch ken cellphone.
Natiliw met ni Salonga iti operasyon sadiay Monticello, Camp 7 a nakakumpiskaran ti 0.5 gram ti maatap a shabu ken cellphone.
Natiliw metlaeng ni Rodriguez iti operasyon sadiay Puguis, La Trinidad, Benguet kalpasan a nagilako ti 0.5 gram ti maatap a shabu iti nakatransaksionna nga operatiba ken nakumpiskar kenkuana ti cellphone ken motorsiklo.
Narekober kadagitoy ti naaramat a buy-bust money ken iti agdama ket sumangsangondan iti kaso a panaglabsing iti Comprehensive Dangerous Drugs Act of 2002.
