BAGUIO CITY – Epektibo ita nga aldaw ti Biyernes, January 21 ket maipasidongen iti Alert Level 4 dagiti probinsia ti Kalinga, Ifugao ken Mountain Province ditoy Rehion Cordillera ken agpaut daytoy agingga inton tapos, January 31.
Maibasar iti waragawag ti National IATF, gapu daytoy iti panagngato ti kaso ti COVID-19 kadagiti nasao a lugar.
Maipangpangato ti alert level ti maysa a lugar ditoy pagilian kagiddan ti panagngato met ti healthcare utilization rate daytoy kas maibasar iti metrics nga intuding ti National IATF.
Maipaspasidong met iti Alert Level 4 ti maysa a lugar no ti kapartak ti panagwaras ti COVID-19 ditoy ket adda iti moderate-risk agingga high-risk ken ti healthcare capacity daytoy ket nangatngato no iti 70%.
Maibasar iti record ti Department of Health-CAR idi kalman, January 20, addan iti moderate risk ti Hospital Care Utilization Rate (HCUR) iti rehion, no sadino, ti average utilization rate ket 68.59%.
Kadagiti probinsia a naipasidong iti Alert Level 4, addan iti critical risk ti HCUR ti Kalinga kalpasan a nailista ti 92% a bed utilization rate sadiay.
Adda metten iti high risk ti HCUR ti Mountain Province kalpasan a nailista ti 81.41% a bed utlization rate sadiay.
Nupay kasta, adda latta iti low risk ti HCUR ti Ifugao a nakailista ti 60.87% a bed occupancy rate.
Iti sidong ti Alert Level 4, maiparit a rumwar iti balayda dagiti 18-anyos nga agpababa ken dagiti 65-anyos nga agpangato, pakairamanan dagiti addaan ti dadduma a sakit ken dagiti masikog.
Maiparparit met ti panaglukat dagiti pagsine-an, funfairs, live voice ken wind instrument events ken amin a contact sports nga uray pay indoor wenno outdoor dagitoy.
Maiparparit pay ti face-to-face wenno in-person classes malaksid kadagiti inaprobaran ti IATF wenno Office of the President.
Maipalpalubos ti operasyon dagiti establishimento kas kadagiti panganan, barber shops, spas ken beauty salons nupay 10% ti indoor venue capacity ken para laeng kadagiti fully vaccinated bayat a 30% ti outdoor venue capacity.
Kabayatanna, manipud iti Alert Level 2 ket epektibo metten ti Alert Level 3 iti probinsia ti Apayao.
Daytoy ket kalpasan a nakailista ti probinsia iti 79.07% a bed utlization rate.
Gapu iti daytoy, kapadan ti Apayao ti alert level ti Benguet ken Abra ken Baguio City nga adda ita iti Alert Level 3.
