Nasarakanen dagiti tallo manipud kadagiti uppat nga indibidual a pimmusay gapu iti landslide bayat ti bagyo nga Uwan sadiay Barangay Western Uma, Lubuagan ita nga aldaw, Nobyembre 11,2025.
Kinumpirmar ni Municipal Administrator Atty. James Tagaotao a dagiti tallo ket da Rix Magwin, Ricardo Magwin, ken Aquino Magwin no sadino nasarakan dagitoy bayat ti naipatungpal a search and retrieval operations.
Nupay kasta, agtaltalinaed a mapukpukaw paylaeng ti kaduada a ni Barangay Kagawad Redento Tinio ngem nakita dagiti rescue teams ti bagi daytoy iti narisgo a disso.
Gapu iti dayta, nagdesisyon dagitoy nga ituloy ti search and retrieval operations inton bigat.
Iti baet dayta, kiniddaw ti Barangay Captain ti Western Uma ken ti Local Government Unit ti Lubuagan iti Provincial Disaster Risk Reduction and Management Office (PDRRMO) a mangideploy dagitoy iti agbantay iti karayan tapno mabantayan ti bagi ti biktima iti kanito a pumigsa ti danum iti karayan.
Sigun kenni Atty. Tagaotao, sangapulo nga indibidual ti nagturong kadagiti pagtaenganda iti baet a nakoberan daytoy iti daga gapu iti landslide tapno alaen dagiti kagawaan dagitoy bayat ti nasao a bagyo idi Nobyembre 10,2025.
Nupay kasta, napasamak manen ti panagregaay ti daga a nangitunda iti panaka-trapped dagiti uppat.
Nabaelan met dagiti innem a nakapanaw bayat ti nasao nga insidente.
Naiturn-over metten ti bangkay dagiti tallo a nasarakan kadagiti pamilya dagitoy bayat a nangipaay ti Municipal Government ti Lubuagan ken ti Kalinga Provincial Local Government Unit iti tulong kadagiti pamilya dagitoy.
