Nakemmeg iti maikadua a gundaway ti maysa a 35-anyos a dental assistant kalpasan a nagpammarang kas license doctor iti maysa nga entrapment operation iti siudad.
Sigun kadagiti otoridad, ti suspek a residente idiay Bonuan Gueset, Dagupan City, Pangasinan, ket nakemmeg iti alas-4:40 iti malem idi Marso 9 iti maysa a motel nga asideg iti Malcolm Square iti Perfecto Street, Baguio City.
Naisayangkat ti operasion babaen kadagiti kameng iti Mountain Province Provincial Cyber Response Team.
Nakumpiskar dagiti pulis manipod iti suspek ti sumagmamano a dental tools ken materiales karaman ti brackets, pliers, rubber bands, mixers, ken cement liquid.
Maibasar iti rekord iti pulisia, natiliw metlaeng ti suspek idi Mayo 18, 2025 gapu iti kapada a panaglabsing. Saan pay nga inlawlawag dagiti otoridad nu kasano a nawaya-wayaan ken nu kasanona nga intuloy ti iligal nga aramid.
Sumango ti suspek iti kaso a panaglabsing iti Republic Act No. 9484 gapu iti panangisayangkatna iti dentistry nga awanan iti propesional a lisensia.
Mapilaan metlaeng daytoy iti reklamo iti sidong iti Republic Act No. 10175.
Iti agdama, adda iti kostodia daytoy iti Regional Anti-Cybercrime Unit Cordillera.
