Nangiruar ti manifesto of unequivocable of support wenno ti awan duadua a suporta dagiti 39 a Kongresisita iti Norte, para kenni House Speaker Faustino “Bojie” Dy III.
Daytoy ket kagiddan ti suyangguseng maipapan ti panagbalbaliw ti liderato iti Kamara.
Indauluan ni House Majority Leader Ferdinand Alexander “Sandro” Marcos III ti Ilocos Norte ti panagpirma, kaduana ni Deputy Speakers Kristine Singson-Meehan ti Ilocos Sur ken Francisco Paolo Ortega V ti La Union.
Nakalanad iti manifesto a sibubukel ti supurta dagiti mammanday linteg manipud iti Region I, II ken Cordillera Administrative Region (CAR), maibasar iti natibker a pammati, panagkaykaysa ken talek.
Nagpirma met dagiti mammanday linteg sadiay Ilocos Norte, Region II, Cordillera Region kas kenni Abra Rep. Joseph Sto. Niño B. Bernos, Apayao Rep. Eleanor Bulut-Begtang, Benguet Rep. Eric G. Yap, Baguio City Rep. Mauricio G. Domogan, Ifugao Rep. Solomon R. Chungalao, Kalinga Rep. Caroline B. Agyao ken Mountain Province Rep. Maximo Y. Dalog Jr.
Sumagmamano met kadagiti Party-list Reps. ti nagpirma kas iti Solid North Party-list Rep. Ching B. Bernos, PHILRECA Party-list Rep. Presley De Jesus, ABONO Party-list Rep. Robert Raymund M. Estrella, United Senior Citizens Party-list Rep. ken dadduma pay.
