BAGUIO CITY – Pimmusay ti 48-anyos a lalaki gapu iti panakauram ti pagtaengan dagitoy idiay 035 Simsim Compound, Tiptop, Pacdal, Baguio City idi rabii, Hulyo 12.
Daytoy ket empleyado ti pribado a kompanya ken maysa kadagiti agtagikua iti nauram a pagtaengan.
Mapatta-patta a dumanon iti P5-million ti danyos ti nauram a pasdek.
Maibasar iti inisyal nga imbestigasyon ti Bureau of Fire Protection – Baguio, nagrugi ti uram idi 8:30 ti rabii ken naideklara ti fireout 10:43 pm
Sigun kadagiti concerned citizen, nabaelan ti 48-anyos a lalaki a nagkiddaw ti tulong kadagiti kaarrubada ken inispalna pay ti kakadwana iti nasao a pagtaengan.
Ngem saanen a nakaruar pay daytoy manipud iti uneg gapu iti napartak a panagramaram ti uram.
Natalged met ti kasasaad ti uppat pay nga indibidual ken nakaawatda ti tulong manipud iti City Social Welfare and Development Office ken Department of Social Welfare and Development.
Iti agdama, manarimaan ti kanayonan nga imbestigasyon dagiti kameng ti bombero para iti rason ti panakuram ti nasao a pagtaengan.//Bombo Jez Lapizar & Bombo Marinel Rodrigo
