BAGUIO CITY – Maysa a babai ti nasarakan nga awanan biag sadiay Mt. Santo Tomas, Cabuyao, Poblacion, Tuba, Benguet idi kalman, Mayo 13.
Nabigbig daytoy a ni Jacqueline Mandigma, 50-anyos.
Iti interview ti Bombo Radyo kenni PCpl. Jayrald Aleo, Investigator On Case iti Tuba MPS, nakabitin daytoy iti steel tube pipe ti abandoned tent nu sadinno nagalutan ti tengngedna iti yellow nylon rope.
Narekober dagiti sumagmamano nga usarna kas iti ID, kawes, sapatos, medyas, kapote ken daduma pay a personal a banag.
Maibasar pay iti naipatungpalda nga inspection, napagamwan a dagiti adopted parentsna ket manipud Imus, Cavite.
Iti agdama, adda ti bagi ti babai iti Cosmopolitan Memorial Chapels Funeral Services.
Maaw-awagan dagiti mapukpukawan ti miyembro ti pamilya nga agturong laeng iti maseknan nga opisina ti pulisya para iti impormasyon.
Iti agdama, maim-imbestigaran ti rason ti pupusay ti nasao nga indibidual.//Bombo Jez Lapizar
