BAGUIO CITY – Ad-adda pay a bimmaba ti temperatura iti Baguio City ken kadagiti nangangato a munisipyo iti Benguet, Ifugao ken Mountain Province ita nga agsapa.
Sigun kenni PAGASA-Baguio weather forecaster Efren Dalipog, iti 6:30 itay agsapa ket nairekord ti 9.4°C a temperatura ditoy Baguio.
Nababbaba daytoy no idilig iti 9.6°C a nairekord iti 6:00 ken iti 10.0°C a nairekord iti 5:30 ita nga agsapa.
Kinunana a resulta paylaeng daytoy ti hanging amihan nga agtataud saiday Siberia a nagngrugi idi pay napalabas a bulan ti Enero ken manamnama nga agpaut agingga ita a bulan ti Pebrero.
Nupay kasta, nababbaba iti 2-3°C ti temperatura iti sumagmamano a disso iti Benguet, Ifugao ken Mountain Province gapu iti nangatngato a lokasyon dagitoy.
Maipalagip nga iti datus ti PAGASA, nairekord ti kababaan a temperatura iti Baguio City idi January 18, 1961 a dimmanon iti 6.3°C.
