La Trinidad, Benguet- Panggep ti munisipo ti La Trinidad a buklen inton sumaruno a tawen ti Twin Giant Strawberry Cake tapno agbalin kas largest Strawberry cake a kasaruno ti agdama a Guiness World Record title kas largest Strawberry a nagun-od ti munisipyu.
Iti panakiuman ti Bombo Radyo kenni La Trinidad Mayor Romeo Salda, kinunana a ti twin giant strawberry cake ti immuna a panggepda nga aramiden ita a tawen.
Nupay kasta, saan nga umdas ti espasyo a pangaramidanda iti nasao a Strawberry Cake gaputa nabayagen a naaramat ti Municipal gymnasium para iti Business One Stop Shop.
Sigun pay iti nasao a Mayor, agbayag iti dua a bulan ti panakaaramid ti nasao a giant cake.
Maipalagip nga idi tawen 2004, nagun-od ti munisipyo ti La Trinidad ti Guinness World Record title a largest Strawberry cake.
Kabayatanna, kinuna ni Mayor Salda a nakipartner dagitoy iti maysa a bakeshop company.
Immuna metten nga imbinglay ni La Trinidad Tourism Officer Valred Olsim a naaddan dagitoy iti parikut iti naaramid nga strawberry cake idi napalabas a tawen, partikular iti kalidad ti nasao a cake gaputa nakipartner dagitoy kadagiti nagduduma a bakeshops.//Bombo Genzel Depayso
