Nasarakanen ti 14-years old a babae a mapukpukaw nga immunan a naipablaak iti social media page ti Bombo Radyo Baguio idi April 07,2025
Iti pannakiuman ti Bombo Radyo kenni PMAJ Marcy Grace Marron, adda ti concerned citizen a nagkomento iti Facebook post ti Bombo Radyo Baguio a nakitana ti nasao nga ubing ken ti kadwa daytoy a lalaki iti maysa a bus stop wenno terminal sadiay Agoo, La Union.
Gapu iti dayta, impakaamo ti nanang ti biktima ti nasao nga impormasyon kadagiti investigators ti Baguio City Police-Police Station 4.
Dagus met dayta nga inkoordinar ti Baguio City Police-Police Station 4, kadagiti kameng ti pulisya sadiay Agoo Municipal Police Station.
Impakaamo pay ni PMAJ Marron a balligi a nasarakan wenno nakita dagiti personnel ti Agoo Municipal Police Station ti menor de edad a babae ken ti kadwana a lalaki ken inturongda met dagitoy sadiay stasyon ti pulisya.
Impettengna pay a dagus met a nagturong sadiay Agoo Municipal Police Station ti nanang ti menor de edad kadwana dagiti sumagmamano a personnel ti Baguio City Police-Police Station 4 tapno sunduenda ti menor de edad ken ti kadua daytoy.
Iti agdama, manarimaan paylaeng ti imbestigasyon dagiti kameng ti Baguio City Police-Police Station 4 seknan iti sibubukel a napasamak.
Maipalagip nga idi April 07, 2025 ket personal a nagturong iti istasyon ti Bombo Radyo Baguio ti nanang ti menor de edad a babae tapno agpatulong seknan iti anak daytoy a saan a nagaw-awid idi April 5, 2025.
