Maur-uray paylaeng a maideliver iti Baguio City ti nasurok 50 nga Automated Counting Machines (ACM) a maaramat para iti umadanin a 2025 Midterm Elections.
Iti panakiuman iti Bombo Radyo kenni Atty. John Paul Martin, election officer iti Commission on Elections-Baguio,kinunana nga immunan a naideliver iti siudad ti nasurok 160 wenno 170 nga ACM idi Biernes Santo.
Sigun kenni Atty. Martin, apaman a makompleto dagiti makina ket agkiddawda iti treasury office iti deployment kadagiti makina para iti final testing.
Iti agdama, nainget a mabanbantayan dagiti makina iti secured a pasilidad wenno warehouse sadiay Camp 7 nu sadino, adda dagiti nadutukan nga agbantay kadagitoy 24/7.
Iti sabali a bangir, naituding met a sumangpet iti City of Pines dagiti opisyal a balota iti ngudo iti agdama a bulan.
Sigun kenni Atty. Martin,mabalin a maibaga a nakasaganan ti siudad para iti umadani nga eleksyon apaman a makompleto wenno sumangpet amin dagiti makina ken balota nga isu ti ipangpangrunada iti agdama.//Bombo Rob Dominguez
