Inlawlawag ni Baguio City Mayor Benjamin Magalong a temporaryo a nairekep ti Athletic Bowl Tennis Court gaputa adda pay dagiti kanayunan a matarimaan nangruna iti parking lot area ti nasao a lugar.
Iti pannakiuman ti Bombo Radyo kenkuana, kinunana nga adda pay dagiti tarimaanen dagitoy iti baro a sistema para iti parking lot sadiay gapu ta maar-aramat ti teknolohiya bayat ti operasyon daytoy.
Nupay kasta, bayat ti pannakai-testing ti nasao a teknolohiya, nakitaan daytoy iti sumagmamano a technical glitch rason a daytoy ti manarimaan a maisingsingpa.
Immunan metlaeng a pormal a nainagunaran daytoy iti May 5,2025 ken nailukat daytoy iti publiko idi June 2,2025.
Iti baet dayta, naipayulog ti advisory idi June 5, 2025 a temporaryo a maiparekep ti parking lot iti baro a kalukat a tennis court.
Maipalagip pay nga iti nasao nga advisory ket awan ti rason a nakalanad no anya ti rason a maiparekep daytoy a nangitunda iti adu a damag ti publiko nangruna dagiti mangpadpadaan iti pannakailukat daytoy.
Daytoy ket gaputa dakkel a tulong kadagiti addaan iti lugan agsipud ta maysa a parikut iti siudad ti kinakurang ti parking lots/spaces.
Gapu iti dayta, namnamaen dagitoy ti dagus a pannakailukat manen daytoy.
Umaw-awat metlaeng iti pammabalaw ti lokal a gobierno iti siudad manipud kadagiti sumagmamano nga indibidual gapu iti kinangina ti singir ti parking fee sadiay.
Inlawlawag met daytoy ti mayor a ti nasao a parking fee ti napagnunumuan ti City Council.
Innayonna pay nga ar-aramidenda nga standard ti parking lot, bayat nga impaganetgetna nga awan ti corruption a mapaspasamak.
Kabayatanna, silulukat ken mabalin met a pagay-ayaman ti tennis court sadiay gaputa ti laeng temporaryo a naipasara ket ti parking lot ngem manamnama a mailukat metlaeng daytoy iti kabiitan a panawen iti kanito malpas ti simsimpaen dagitoy.//Bombo Noveh Organo
