LA TRINIDAD, BENGUET – Agtultuloy ti information dissemination ti Rural Health Unit ken dagit dadduma pay a maseknan nga ahensya kadagiti umili ti munisipyo ti La Trinidad, Benguet seknan iti prevention ken early detection ti sakit a cancer.
Iti pannakiuman ti Bombo Radyo kenni Dr.Genevieve Wagang-Degay, Medical Officer III/NCD Cluster Head iti nasao a munisipyo, kinunana a numan pay bimmaba ti kaso ti cancer ket agtultuloy latta ti panangisuro dagitoy kadagiti umili.
Daytoy ket babaen kadagiti panangisayangkatda kadagiti nagduduma nga aktibidad kas iti free medical services.
Sigun kenni Dr. Degay manipud iti walo pulo ket tallo a kaso ti cancer a nailista idi 2023 adda laengen ti innem a pulo ket lima a cancer cases idi napalabas a tawen.
Kadawyan met kadagiti cancer patients dagitoy ket dagiti natataengan.
Impeksa ti Dr. Degay a maysa a mapatpatta a rason ti panagbaba ti cancer iti munisipyo ket ti panagngato ti pannakaammo dagiti indibidual mainaig iti cancer.
Kinunana a daytoy ket gapu metlaeng kadagiti panangisayangkatda kadagiti nagduduma nga aktibidad ken panagbisbisitada kadagiti babarangay para iti information campaign dagitoy.
Malaksid iti dayta, ket maysa a rason ti panagbaba ti kaso ket nadalusanen ti datos dagitoy no sadino dagiti saan nga umili iti nasao a munisipyo ket naikkatdan iti datos ti La Trinidad.
Kagiddan dayta, inyunay-unayna a kasapulan latta ti panangiaplikar kadagiti insursuroda para iti seguridad dagitoy.//Bombo Noveh Organo
