Ngimmato ti presyo ita dagiti natnateng particular iti La Trinidad Vegetable Trading Post sadiay La Trinidad, Benguet.
Iti panakiuman ti Bombo Radyo kenni Rassielyn Alba, Price monitor ti Department of Agriculture, kinunana a ngimmato daytoy gapu iti bassit a suplay ti nateng.
Sigun kenkuana, manipud iti P45 a presyo ti repolyo sadiay ket ngimmato iti P50 tunggal kilo.
Kabayatanna, impetteng ti maysa kadagiti disposer sadiay a bassit dagiti mannalon a simang-at a nangilako iti mula-da gapu paylaeng metlaeng iti pannakairekep dagiti kalsada gapu iti landslide.
Iti baet dayta, adu metten dagiti mannalon a simang-at ita nangruna ket simmayaat ti sasaaden ti panawen.
Kagiddan dayta, iti met pannakaiuman ti Bombo Radyo kenni Agrex Sanio, maysa a mannalon manipud Buguias, Benguet, kinunana nga adu ti nadadael a mula dagitoy nangruna dagiti leafy vegetables.
Gapu iti dayta, nagbalin iti 2nd class dagiti 1st class a nateng.//Bombo Noveh Organo
