Impakaammo ni Senate President Vicente “Tito” Sotto III nga agsubli kas dadaulo iti Senate Blue Ribbon Committee ni Senate President Pro Tempore Panfilo “Ping” Lacson.
Sigun kenni Senator Sotto, nangngeddeng ni Senator Lacson nga agsubli iti nasao a chairmanship kalpasan ti panangkiddaw iti daytoy dagiti kakadwana a senador ken daduma iti publiko.
Maipalagip a naglusulos ni Senator Lacson kas chairman iti SBRC kalpasan a maatap nga impeksa dagiti daduma a kakadwana a saanda a magustwan ti panangidaulona iti nasao a komite partikular ti manarimaan nga imbestigasyon kadagiti naanomalyaan a flood control projects.
Gapu iti dayta,temporaryo a nagserbi ni Senator Erwin Tulfo kas acting chairman iti Senate Blue Ribbon Committee.
Kabayatanna, sakbay a nangngeddeng ni Lacson, kinunana a rumbeng a nakasagana ti Sotto iti posible nga epekto ti panagsublina iti posisyon iti liderato ti Senado gapu ta posible nga adda dagiti kakadwa dagitoy iti majority bloc ti umikkat iti grupo a posible a makaapektar iti liderto ni Sotto.
Mainaig iti dayta, immunan nga impetteng ni Senate Minority Leader Alan Peter Cayetano kenni Senator Lacson a saandan nga iraman ti minorya iti pakaseknan wenno internal issues dagitoy iti mayorya maipapan iti chairmanship iti nasao a komite.
