Malamlamayan itan ti pimmusay a lalaki a maibilang a National Most Wanted Person iti napasamak nga engkwentro bayat ti pannakaiserbi ti warrant of arrest kenkuana idiay Lubuagan, Kalinga, idi kalman.
Nabigbig ti suspek a ni Corey Dickpus, agtawen ti 68, a residente ti Poblacion, Lubuagan, Kalinga a sumangsango iti kaso a “murder” ken frustrated murder. Ti lalaki ket addaan iti ₱1-million reward manipod iti Department of the Interior and Local Government (DILG).
Naisayangkat ti operasion idiay Sitio Tocpao, Barangay Poblacion, kalpasan a nakaawat dagiti otoridad iti impormasion manipod kadagiti umili seknan iti presensia ti suspek iti lugar.
Sigun kadagiti kameng ti pulisya, nagtignay dagiti otoridad nga iserbi ti warrant idi napasamak ti komprontasion. Nadangran ti maysa a pulis ken dagos a naiturong iti pag-agasan para iti pannakatamingna.
Naiturong metlaeng ti suspek iti Kalinga District Hospital ngem naideklara a pimmusay.
Manarimaan metten ti kanayunan pay nga imbestigasion dagiti otoridad iti napasamak nga insidente.
Ti suspek ket sigud nga opisial idiay Lubuagan, Kalinga ken sigud a nagserbi kas bise mayor iti nasao a munisipyu ken kapitan ti Poblacion.
