Nagkomenton ti aktres ken TV host a ni Anne Curtis seknan iti insawang ni Quezon City 4th District Representative Bong Suntay panggep kenkuana bayat ti hearing iti House of Representatives.
Sigun kenni Anne, saan a dagus a nagkomento daytoy apaman a rinumwar ti nasao nga isyu gaputta inun-unana a makadua ti pamilyana gapu iti pannaka-stranded da idiay Middle East.
Ngem gapu ta nakaawiden daytoy iti pagilian, impettengna a kasapulan nga agsao daytoy seknan iti nasao nga isyu saan a tapno agibales, ngem gapu ta patienna a saan a rumbeng nga agulimek daytoy para kadagiti babbai a makapadpadas iti kapada a sitwasyon.
Inawagan ti aktres ti insawang ti mammanday-linteg a “bulgar ken sexualized” nangnangruna ta dinakamat daytoy ti naganna.
Inaklon daytoy a nasaktan ken nakarikna daytoy ti pungtot apaman a naamuanna ti nasao nga isyu.
Innayonna a saanen daytoy a baro kadagiti kapada ngem inyebkasna ti pannakriribokna gapu ta ti nasao a sekswal a komento ket nagapu iti maysa nga opisyal ti gobyerno.
Saan nga inawat ti aktes ti panagkiddaw ni Suntay ti dispensar nupay binigbig ti aktres ti panangkiddaw ti pammakawan ti asawa daytoy iti pamilyana.
Kabayatana, mannarimaan ti panagkonsulta ti akres iti abogado daytoy tapno adalenda ti posible a legal nga addang a maaramid seknan iti napasamak. //Bombokcs
