Nakumpiskar ti agarup PhP2,817,440.00 a gatad ti iligal a droga ken naarestar ti maysa a drug personality iti nagsina nga operasyon a naipatumpal iti probinsiya ti Benguet ken Kalinga itay kanikadua.
Iti naipatumpal a marijuana eradication operations iti probinsiya ti Benguet, nadiskubre iti agarup 2,880 a fully grown marijuana plants ken 10,300 grams ti dried marijuana stalks with leaves ken fruit tops nga addaan pakabuklan a Standard Drug Price a P1.8 Milyon iti pito a plantasyon iti Barangay Kayapa, Bakun, ken Barangay Badeo, Kibungan.
Idiay met Kalinga, nadiskubre ti maysa a plantasyon ti marijuana a namulaan ti lima ribo a puon ti fully grown marijuana plant nga adaan iti Standard Drug Price a P1,000,000.00 iti naisayangkat a marijuana eradication operation ti Tinglayan Municipal Station ken 2nd Kalinga PMFC ti Kalinga Provincial Police, kadua ti PDEA-Kalinga idiay Barangay Ngibat, Tinglayan.
Amin dagiti nadiskubre a marijuana ket dagos a pinarot ken pinuoran dagiti operatiba bayat nga agtultuloy ti imbestigasyon tapno mabigbig dagiti indibidwal a responsable iti panangimula kadagitoy.
Kabayatanna, naarestar idiay Rizal ti 29-anyos a lalaki a nailista kas Street Level Individual iti buy-bust operation a naisayangkat idiay Brgy. Babalag East.
Naarestar daytoy kalpasan a nangilako daytoy iti maysa a sachet ti maatap a shabu nga addaan kadagsen nga 0.8 gramos ken Standard Drug Price nga P5,440.00.
Naipaima meten ti suspek ken dagiti nakumpiskar nga ebidensya iti kustodiya ti Provincial Drug Enforcement Unit para iti dokumentasyon ken disposisyon.
Sumango ti suspek iti pananglabsing iti Republic Act No. 9165 wenno Comprehensive Dangerous Drug Act of 2002. //bombokaren.c.s
