Pimmusay ti lima nga indibidual ken 22 ti nadangran kalpasan a nabaliktad ti maysa a six-wheeler truck a naglaon iti 39 a pasahero idiay Sitio Guay, Poblacion, Kabayan, Benguet iti alas-10 agsapa ita nga aldaw.
Sigun kenni Kabayan Mayor Rex Alwin Aquisan, napasamak ti aksidente iti kalsada iti Congressman Andres Acop Cosalan Road ken naipadamag iti Kabayan MDRRMO iti alas-10:07 iti agsapa.
Maibasar iti inisial nga imbestigasion, nagtaud idiay Bauko, Mountain Province paturong idiay Nueva Vizcaya ti truck idi nagbaliktad daytoy gapu iti mapapati a mechanical failure.
Dagos a nagresponder dagiti kameng iti MDRRMO, PNP, BFP, RHU ken dagiti volunteer responders.
Iti inisial a report, 10 a pasahero ti nagsagrap iti nakaro a pannakadunor iti ulo ken pannakatukkol iti tulang ken naiturong iti Dennis Molintas District Hospital idiay Bokod, Benguet. Sangapulo ket dua ti nagsagrap iti minor injuries ken manarimaan ti pannakatamingda iti pag-agasan idiay Kabayan RHU, karaman ti drayber.
Kabayatanna, 12 a pasahero ti saan a nadangran ken temporario a naiturong iti RHU ken Barangay Hall iti Poblacion.
Kinumpirmar metlaeng iti LGU ti ipupusay iti lima a pasahero, karaman iti maysa nga agtawen iti 3, agtawen iti 11, agtawen iti 49 a lalaki, ken dua a lallaki nga adda iti umno a tawen a maur-uray ti pakabigbiganda.
Agtultuloy ti panagmonitor iti LGU ken dagiti ahensia ti kasasaad ken mangipapaay iti tulong kadagiti biktima ken ti pamiliada.
Immapel manen ni Mayor Aquisan iti publiko nga agaldaw iti panagbiahe, nangruna kadagiti kabambantayan a kalsada tapno maliklikan dagiti aksidente.
