Makikokoordinar ita ti Munisipyo ti La Trinidad iti Department of Science and Technology, National Irrigation Administration, ken dadduma a maseknan nga ahensya para iti pannakasulbar ti kinakurang iti water supply iti nasao a munisipyo.
Sigun kenni La Trinidad Mayor Roderick Awingan, inlawlawag kenkuana ni General Manager ti La Trinidad Water District a bimmaba ti kabaelan dagiti water resource a mai-supply.
Iti datos a naipresenta kenkuana idi December 2025 medyo nangato paylaeng ti kabaelan dagitoy a maisupply.
Dumanon ti suplay danum iti agarup 430 cubic meters iti bulan ti Enero, bimmaba iti 372 cubic meters idi Pebrero, ngimmato ti 385 cubic meters, ken bimmaba manen ti 361 cubic meter idi Abril ti agdama a tawen.
Innayonna pay nga impeksa ti General Manager kenkuana a posible nga agtultuloy ti panagbaba daytoy.
Sigun iti manager, gapu iti makitkitada a sitwasyon, posible a nakaronto pay ti panagbaba daytoy iti sumarsaruno a bulan.
Impeksana nga iti agdama, adda iti duapulo ket tallo a deepwells iti nasao a munisipyo no sadino panggepda a nayonan dagitoy.
Malaksid iti dayta, adaddalen pay dagitoy dagiti posible maaramid kas iti rainwater harvesting/catchment facility ken daduma pay.
Iti agdama, saan man a mapa-adu ti suplay ti danum, impeksa met ti Water District Provider nga araramidenda amin ti kabaelanda a mangsuplay kadagiti konsumer dagitoy babaen iti scheduling.
Kagiddan dayta, agkidkiddaw dagitoy ti pannakaawat manipud iti publiko. //Bombo Noveh Organo
