Imbinglay ni Atok Councilor Kelly Denn Tomas a nailaylayon ti Temporary Restraining Order kontra iti barikada idiay Mankayan, Benguet iti 17 nga aldaw.
Daytoy ket maipanggep iti mannarimaan nga isyu ti panggep a drilling operation ti maysa a dakkel a mining company idiay Sitio Colocol ken Caew.
Iti pablaak ni Councilor Tomas, maysa kadagiti nainget a mangsupsuporta kadagiti residente a mangkonkontra iti pannakaipatungpal ti exploration iti nasao a lugar, imbinglayna a kagiddan ti pannakailaylayon ti TRO ti agreement a maisardeng ti pilit a panangiyuneg ti mining company kadagiti drilling equipments da.
Iti baet dayta, agtuloy latta ti panagbarikada dagiti residente ti Guinaonag ken Bulalacao.
Imbinglay metlaeng ni Councilor Tomas a nangipilada idi pay laeng napalabas a bulan iti formal petition tapno kwestionaran ti nagbalin a proseso ti panagkiddaw ti kompanya iti consent manipud kadagiti residente no sadino agingga ita, awan pay laeng ti naaw-awatda a sungbat.
Kagiddan dayta, imbinglay ni Councilor Tomas a nangipila ti nasao a mining company idi kalman iti ‘resumption of operation’ iti Sanggunianng Panlalawigan.
Gapu iti daytoy, ginuyugoy ni Councilor Tomas ti publiko a makimaymaysa kadakuada tapno masalwadan dagiti taltalon da sadiay. //bombokaren.c.sapirao
