Kidkiddawen ita dagiti Barangay Officials ti Barangay Karao, Bokod, Benguet ti panangpondo ken pannakaimuntar ti slope protection kadagiti bantay nangruna kadagiti nargaay nga asideg kadagiti taltalon ken komunidad.
Sigun kenni Amar Angelo Modi, Barangay Chairman iti nasao a barangay, agarup tallo pulo a mannalon ti apektado gapu iti nargaay a paset ti bantay idiay Sition Taki, Barangay Karao, kalpasan a naapektaran dagiti sumagmamano a taltalon sadiay.
Innayona metlaeng a daytoy ti maysa kadagiti prayoridad ti barangay a nasken nga unaen a simpaen iti kanito nga adda ti kanayonan a pundo nga ipaay ti gobyerno ken panagadal manipud iti maseknan nga ahensya nu anya ti kasayaatan nga aramiden sadiay.
Inlawlawag pay daytoy a dagiti ngamin batbato ken daga manipud iti nargaay a bantay ken maysa kadagiti mangitundtunda iti adu a siltation idiay Upper Agno River, Ambuklao, Bokod, Benguet. Impeksa ti nasao nga opisyal a nargaay ti bantay gapu iti panagtutudo.
Kabayatanna, imbinglay daytoy a halos amin a barangay iti Munisipyo ti Bokod ken apektado gapu kadagiti taltalon a nagabgaburan ken neperdi a mula dagiti mannalon.
Impakaammo met ti nasao nga opisyal nga addan ti pondo a sag P10 Milyon a nailatang manipud iti Provincial Government para iti kalsada a nargaay iti nasao a barangay. //via Bombo Noveh Organo
