Nakasagana ti plano ti City Disaster Risk Reduction and Management Council (CDRRMC) tapno maliklikan wenno mapabassit dagiti epekto ti El Niño a manamnama a mapasaran iti pagilian manipud iti maudi a bulan ti 2026 agingga iti 2027.
Sigun kenni Charles Bryan Carame, Department head ti Baguio City Disaster Risk Reduction and Management Office (CDRRMO), addan ti naituding a pondo ti ahensya para kadagiti addang a maipatungpal tapno makasagana ti siudad iti posibleng panagkurang ti danum ken dadduma pay nga epekto ti el nino.
Innayon ni Carame, agtultuloy met dagiti proyekto ti lokal a gobierno iti panangsalaknib ken panangpasayaat iti suplay ti danum, pakairamanan ti pannakipagtrabaho iti Baguio Water District (BWD).
Maysa kadagiti proyekto ket ti panangibangon iti rainwater harvesting facility sadiay Quirino Hill, a naituding ti pondo a dumanon iti P50 million.
Malaksid iti dayta, adda ti sabali a plano a maipatungpal iti pannakikoordinar ti siudad ken ti water district, ngem kasapulan ti ad-adu a pondo tapno maisayangkat daytoy.
Sigun kenkuana, P90 million ti initial funding a naala para iti nasao a proyekto, bayat a P300 million agingga P400 million ti kidkiddawen ti water district para iti pannakakompleto daytoy.
Nupay kasta, inyebkas ni Carame a P90 million ti naala ni Mayor Benjamin Magalong para iti nasao a proyekto, a manamnama a marugian inton sumaruno a tawen.
Maibasar iti report, agarup 60,000 cubic meters ti kasapulan a danum ti siudad iti tunggal aldaw, bayat a 56,000 cubic meters laeng ti maipaay a mangipakita iti nagbaetan ti demand ken suplay ti danum.
Gapu iti daytoy, napateg ti panangpasayaat kadagiti pasilidad a mangurnong iti danum ken ti panangpabileg kadagiti dadduma pay a pagtaudan ti danum tapno makatulong iti panangsango iti napaut a panaginit.
Kabayatanna, maipalpalagip kadagiti residente iti siudad ti panangsalimetmet iti danum ken ti panangliklik iti panangsayang iti daytoy, nangruna iti panawen a bumassit ti tudo ken dumakkel ti kasapulan iti danum.//Bombo Khey Reparip
