Naituding a maideploy dagiti agarup 1,200 a police personnel iti siudad ti Baguio para iti umadanin a parada iti Panagbenga festival highlights.
Iti pannakiuman ti Bombo Radyo kenni PCol. Ruel Tagel, City Director ti Baguio City Police Office, kinunana a nakasaganan dagitoy nga agbantay para iti seguridad dagiti amin a dumar-ay iti parada nangruna inton Pebrero baente tres, gaputa manamnama nga adu dagiti turista a sumang-at iti siudad.
Sigun kenkuana, adda metlaeng dagiti maideploy nga On the Job training students wenno OJTs manipud kadagiti nagduduma a pagadalan ti siudad.
Gapu iti dayta, manamnama a mamintiner ti linak ken kappia iti siudad bayat ti parada.
Kinunana a posible a dumanun iti 150K agingga P160K a turista ti ti manamnama a makipartisipar wenno makipyesta iti syudad ti Baguio.
Dayta ket maibasar metlaeng iti napalabas nga assessmentda idi Panagbenga 2024.
Iti sabali a bangir, nagpalagip dagitoy iti publiko tapno agbalin a naridam ken agalwad iti aglawlaw.
Malaksid iti dayta, kasapulan metlaeng nga aywanan dagiti napapateg nga alikamen kas kadagiti wallet ken selpon tapno saan a madukutan nangruna ta maysa kadagiti numero uno a kaso ket iti panagtakaw nangruna nu kakastuy nga adda iti dadakel nga aktibidad iti syudad.
Innayon metlaeng ti nasao nga opisyal a mabalin a bisitaen dagiti turista ken dagiti residente ti Facebook page dagitoy tapno maamuan ti road traffic information tapno updated ken ammoda ti pagturturunganda a kalsada.//Bombo Noveh Organo
