BAGUIO CITY – Nasarakan ti agruprupsa a bangkay iti maysa a lugan a nakaparada idiay Nambaran, Tabuk City idi kalman, Hunyo 20.
Maibasar iti imbestigasyon ti Tabuk City Police Office, bagi daytoy ti 12-anyos ken grade-5 student.
Mismo nga ulitegna ti nakadiskobre iti daytoy gapu iti saan a napintas nga angot a nagtaud iti lugan.
Dagus met nga inayabanna ti kaaruba dagitoy nga agtagikua iti nasao a lugan ken ditoy a naduktalan ti agruprupsa a bangkay.
Sigun iti nanang ti agtagikua iti lugan, imparada ti anakna ti lugan idi Hunyo 16 sakbay a nagturong kadwana ti asawana idiay Balbalan, Kalinga.
Innayona pay a nakita-da ti biktima a gimmatang iti maysa nga store idi Hunyo 17.
Kabayatana, kinuna ti tatang ti biktima nga adda ti panawen a rumrumuar ti anakna a saan nga agpakpakada.
Saanen a naipasidong iti otopsiya ti nasao a bangkay gapu ta nagkedked ti pamilya daytoy.
