BAGUIO CITY – Manamnama a palawaen dagiti rescuers ti area of operation dagitoy para iti panakabirok ti bagi ti 16-anyos a naiyanod iti waig idiay Mamaga, Balili, La Trinidad, Benguet idi Setyembre uno, iti agdama a tawen.
Sigun kenni PLt.Col. Benson Macli-ing, mangidadaulo iti La Trinidad Municipal Police Station, maiparit wenno saan a paglangoyan ti waig a nakatnagan ti lalaki ngem limed ti panagturongda sadiay.
Sigun kenni Macli-ing, limitado ti panaggaraw dagitoy gapu ta batbato ken nakabutbuteng ti karayan nangruna nu pumigsa ti danum daytoy, nupay kasta ket ar-aramidenda ti kabaelan dagitoy.
Kadwa ti La Trinidad Municipal Police Station dagiti line agencies partikular ti National Bureau of Investigation, Bureau of Fire Protection, opisyales ti Brgy. Balili, volunteers ken daduma pay iti nasao a search and retrieval operation.
Maipalagip a maatap a naigalis ti 16-anyos a nangitunda iti panakalmes ken panakaiyanod daytoy.
