Agsagsaganan dagiti otoridad sadiay South Korea para iti panangipaulog iti maysa pay nga arrest warrant kontra kenni impeached South Korean President Yoon Suk Yeol seknan daytoy iti panangideklarana iti Martial law idi napalabas a tawen.
Iti pannakiuman ti Bombo Radyo kenni Ruel Toquero, Bombo International News Correspondent sadiay South Korea, kinunana a makumikom dagiti otoridad para iti pannakaipaulog ti nasao a warrant of arrest ita nga aldaw.
Iti kanito met a saan a matuloy ita nga aldaw ket posible a maituding daytoy inton bigat.
Sigun kenni Toquero, maipaulog manen ti arrest warrant gapu ta napaay dagiti imbestigador a makaala iti statementna seknan iti panangideklarana iti martial law.
Iti kanito a maipaulog daytoy, maituloy manen ti imbestigasyon kontra kenkuana.
Iti baet dayta, impetteng ni Toquero a dakkel ti pammati ti supporters ti nasao nga impeached president a saan a matuloy ti pannakaipaulog ti arrest warrant agsipud ta patienda nga invalid daytoy.
Gapu iti dayta, panggep dagiti supporters-na nga umakar iti prosecutors office tapno idiay da nga agrally.
Iti sabali a bangir, in-inot metten a puminpintas ti taray ti ekonomiya sadiay agsipud ta dakkel ti pammati dagiti sumagmamano a negosyante iti panangidaulo ti baro a nadutukan a dadaulo iti agdama.
Nupay kasta, adda latta ti panagdanag dagiti sumagmamano nga Overseas Filipino workers sadiay agsipud ta posible a maapektaran dagitoy.
Iti baet dayta, mangnamnama met dagitoy a saanda a maikkat iti trabaho gapu ta sumaysayaat ti turismo iti nasao a pagilian.
